Mae Cynghorau Sgiliau Sector yn cynnig arweiniad i gyflogwyr ar gamau gweithredu strategol wedi’u targedu i ddiwallu eu hanghenion sgiliau sector a busnes. Yn gyfnewid am hyn, maent yn derbyn arian cyhoeddus sylweddol a mwy o drafodaeth gydag adrannau’r llywodraeth a’u hasiantaethau cyhoeddus ledled y DU.

Mae’r Llywodraeth wedi nodi pedwar amcan allweddol i bob Cyngor Sgiliau Sector, sef:

• Lleihau prinder sgiliau a bylchau mewn sgiliau
   
• Gwella cynhyrchiant, perfformiad busnes a gwasanaethau cyhoeddus
  
• Rhoi mwy o gyfle i hybu sgiliau a chynhyrchiant holl weithlu’r sector, yn cynnwys gweithredu ar gyfle cyfartal
  
• Gwella’r ddarpariaeth addysg, yn cynnwys prentisiaethau, addysg uwch a safonau galwedigaethol cenedlaethol

Mae Skillset yn ymrwymedig i ddatblygu ein gweithgareddau i symud yn nes at gyflawni’r amcanion hyn. I gyflawni’r amcanion hyn i’r diwydiannau rydym yn eu cynrychioli, mae Skillset wedi nodi targedau penodol yn ei broses cynllunio busnes. Mae’r rhain wedi’u hamlygu yn swyddogaeth Skillset.

Sut y daeth Skillset yn Gyngor Sgiliau Sector?

Er mwyn bod yn Gyngor Sgiliau Sector, mae Skillset wedi’i drwyddedu gan yr Ysgrifennydd Gwladol dros Addysg a Sgiliau, mewn ymgynghoriad â’r Adran Masnach a Diwydiant, a’r Gweinidogion Dysgu Gydol Oes yng Nghymru, yr Alban a Gogledd Iwerddon.

Skillset oedd y sefydliad cyntaf i gael trwydded fel “Cyngor Sgiliau Sector Arloesol” ym mis Mawrth 2002.

Dyfarnwyd trwydded pum mlynedd lawn i ni ym mis Ionawr 2004 ar ôl mynd trwy broses asesu drylwyr gan yr Asiantaeth Datblygu Sgiliau Sector, Gweinyddiaethau Datganoledig, adrannau perthnasol y llywodraeth, ymgynghorwyr annibynnol a Phanel Asesu Trwyddedau.

Beth mae Cynghorau Sgiliau Sector yn ei wneud?

Mae disgwyl i Gyngor Sgiliau Sector:

• Arwain yr ymgyrch i hybu sgiliau a datblygiad gweithlu’r sector gan wella cynhyrchiant, twf busnes a chyflogaeth wrth wneud hyn
  
• Datblygu gwybodaeth a dadansoddiad heb eu hail o angen sgiliau’r sector, gan eu cyfathrebu’n broffesiynol mewn ffordd sy’n arwain at newid gwirioneddol yn y gweithle a’r cyflenwad o sgiliau sy’n gysylltiedig â gofynion newidiol a gofynion y dyfodol
  
• Dylanwadu’n uniongyrchol ar broses gynllunio ac ariannu addysg a hyfforddiant ledled y DU, gan weithio o fewn y trefniadau arbennig ym mhob gwlad
  
• Creu cysylltiadau cryf rhwng cyflogwyr, ysgolion, colegau, darparwyr hyfforddiant ac addysg uwch i ddylanwadu ar benderfyniadu pobl ifanc ac oedolion nad ydynt yn rhan o’r gweithlu eto
  
• Datblygu tystiolaeth ddarbwyllol a rhannu arferion gorau i hyrwyddo’r achos busnes ar gyfer buddsoddi mewn sgiliau a defnyddio pobl yn fwy effeithiol yn y gweithle
  
• Cael ei gynnal a bod yn nwylo cyflogwyr a thynnu ar arbenigedd ac ymrwymiad undebau llafur, cyrff proffesiynol a rhanddeiliaid eraill yn y sector

Skillset, Focus Point, 21 Caledonian Road, London, N1 9GB. Tel: 020 7713 9800