Aron Evans
Disgrifiwch eich swydd.
Rwy'n rhedeg Cwmni Dinamo ym Mae Caerdydd gydag Owen Stickler, ac yn helpu animeiddio weithiau. Fy mhrif swydd yw ennyn a helpu i gynhyrchu gwaith ar gyfer y stiwdio - cyfresi animeiddio a gwaith interstitaidd gan fwyaf.
Ar ba fath o ffilmiau/rhaglenni yr ydych yn gweithio?
Rydym yn animeiddio trydedd gyfres 'CNEX' (cyfres ddychanol S4/C) gyda chwmni animeiddio Griffilms o Gaernarfon, ac rydym wedi bod yn gweithio ar effeithiau cyfansawdd ar gyfer y gyfres ddrama 'Con Passionate' ar S4C. Rydym hefyd wedi gwneud teitlau ar gyfer rhaglenni Eisteddfod yr Urdd ar y sianel, a byddwn yn dechrau gwaith animeiddio eto cyn hir ar y gyfres ddrama 'O Na Y Morgans'. Rydym yn hefyd gwneud cyfres ryngwladol i blant cyn-ysgol: 'Cwm Teg'.
Beth yw'r oriau gwaith?
9.30yb-6yh yn y swyddfa, ond rwy'n aml yn gweithio gartref gyda'r nos.
Sut wnaethoch chi ddechrau yn y diwydiant?
Daeth Gweithdy Fideo Canolfan Celfyddydau'r Chapter yng Nghaerdydd i'r ysgol (Ysgol Uwchradd Glantaf) i wneud fideo bop, ac fe gymerais i ran yn y peth. Dangoswyd y fideo ar y teledu, ac yna wnes i ac Owen Stickler, disgybl arall (yr oeddwn wedi bod yn ffrindiau ag ef yn yr ysgol gynradd) ffilm animeiddiedig fer Killing Time. Wedi hynny aethon ni i weithio i gwmni animeiddio Cinetig yng Nghaerdydd cyn dechrau Dinamo.
Pa fath o gymwysterau sydd eu hangen?
HND a gradd mewn animeiddio y dyddiau yma yn fy marn i. Dylai pobl ddatblygu'u sgiliau bywlunio hefyd.
Pa gyngor fyddech chi'n ei roi i bobl ar ddechrau'u gyrfa?
Lluniwch bortffolio da o'ch gwaith a datblygwch eich gwefan eich hun. Os gwnewch chi ffilm hyrwyddo gwnewch yn siwr ei fod yn un fer, a gorffennwch trwy wneud amryw o ddarnau gan ddefnyddio technegau gwahanol. Gwnewch yn siwr bod y sain o safon uchel - mae sain gwan ar lawer o ffilmiau hyrwyddo.
Sut dewch chi i wybod am waith sydd ar gael?
Rhwydweithio, gwneud busnes a chysylltiadau - yn y dafarn yn aml, ac nid trwy gyfweliadau ffurfiol yn unig. Dylai pobl ddysgu ymlacio wrth gwrdd â chysylltiadau a pheidio bod yn rhy betrusgar.
